Адыгэ шъуашэм имафэ Тэхъутэмыкъое районым щыхагъэунэфыкIыгъ. Мы мафэм къэралыгъо мэхьанэ иI.
Тэхъутэмыкъое гупчэп цIыф пчъагъэ ит. Шъуашэхэр зыщыгъэу, быракъхэр аIыгъэу, купышхо зэхэтэу къакIорэм пэгъокIых. ЗэкIэри нэгушIу, чэфых. МэфэкIым къекIолIагъэхэм гущыIэ фабэхэр къапигъохыгъ Тэхъутэмыкъое районым ипащэу Шъхьэлэхъо Азмэт.
— Шъуашэм идэхагъэ, ибаиныгъэ, ихъишъэ, игъэпсыкIэ ныбжьыкIэхэм ягъэшIэгъэныр, ягъэлъэпIэгъэныр ары пшъэрылъэу иIэр непэрэ зэхахьэм. Адыгэ шъуашэм лъэпкъыр дунаим цIэрыIо щышIыгъ. Мыухыжь кIуачъэ иI, лIэшIэгъухэми ахэкIокIагъэп. Шъуашэм имызакъоу, лъэпкъ хабзэ дахэхэр, бзэр зыIэкIэдгъэзы, дгъэкIоды хъущтэп. Арышъ, тиадыгагъэ дгъэшIоныр, дгъэлъэпIэныр, дгъэфедэныр, ар къэтыухъумэзэ, тинеущрэ мафэ тыхэхьаныр — джары тимурад шъхьаIэр, Iофыгъо инэу тиIэр.